She's no mine.

She's my grannie's, ye ken.' 'What's the use o' her to her?
She pits nae vailue upon her.

Eh, man, gin she wad gie her to me, I wad haud her i' the best o' shune a' the lave o' her days.' 'That wadna be muckle, Sanders, for she hasna had a new pair sin' ever I mind.' 'But I wad haud Betty in shune as weel.' 'Betty pays for her ain shune, I reckon.' 'Weel, I wad haud you in shune, and yer bairns, and yer bairns' bairns,' cried the soutar, with enthusiasm.
'Hoot, toot, man! Lang or that ye'll be fiddlin' i' the new Jeroozlem.' 'Eh, man!' said Alexander, looking up--he had just cracked the roset-ends off his hands, for he had the upper leather of a boot in the grasp of the clams, and his right hand hung arrested on its blind way to the awl--'duv ye think there'll be fiddles there?
I thocht they war a' hairps, a thing 'at I never saw, but it canna be up till a fiddle.' 'I dinna ken,' answered Robert; 'but ye suld mak a pint o' seein' for yersel'.' 'Gin I thoucht there wad be fiddles there, faith I wad hae a try.

It wadna be muckle o' a Jeroozlem to me wantin' my fiddle.

But gin there be fiddles, I daursay they'll be gran' anes.