It's no barely to consider the time it'll tak me to cloot a pair, but what the weirer 's like to git oot o' them.
I canna tak mair nor the job 'ill be worth to the weirer.

An' yet the waur the shune, an' the less to be made o' them, the mair time they tak to mak them worth onything ava'!" "Surely ye oucht to be paid in proportion to your labour." "I' that case I wad whiles hae to say til a puir body 'at hadna anither pair i' the warl', 'at her ae pair o' shune wasna worth men'in'; an' that wad be a hertbrak, an' sair feet forby, to sic as couldna, like yersel', sir, gang upo' the Lord's ain shune." "But hoo mak ye a livin' that w'y ?" suggested Donal.
"Hoots, the maister o' the trade sees to my wauges!" "An' wha may he be ?" asked Donal, well foreseeing the answer.
"He was never cobbler himsel', but he was ance carpenter; an' noo he's liftit up to be heid o' a' the trades.

An' there's ae thing he canna bide, an' that's close parin'." He stopped.

But Donal held his peace, waiting; and he went on.
"To them 'at maks little, for reasons good, by their neebour, he gies the better wauges whan they gang hame.

To them 'at maks a' 'at they can, he says, 'Ye helpit yersel'; help awa'; ye hae yer reward.