It's the naitral w'y o' 't, ye see, to rin doon, an' it's no mainner o' use gangin' again natur.

Sae, allooin' the thing maun be, ye'll hae till alloo likewise, an' it's a trouth I'm tellin' ye, sir, 'at it's o' nae sma' consequence to the toon 'at the drucken craturs sud fill themsels wi' dacency--an' that's what I see till.

Gang na to the magistrate, sir; but as sune's ye hae gotten testimony--guid testimony though, sir--'at there's been disorder or immorawlity i' my hoose, come ye to me, an' I'll gie ye my han' to paper on't this meenute, 'at I'll gie up my chop, an' lea' yer perris--an' may ye sune get a better i' my place.

Sir, I'm like a mither to the puir bodies! An' gin ye drive them to Jock Thamson's, or Jeemie Deuk's, it'll be just like--savin' the word, I dinna inten' 't for sweirin', guid kens!--I say it'll just be dammin' them afore their time, like the puir deils.

Hech! but it'll come sune eneuch, an' they're muckle to be peetied!" "And when those victims of your vile ministrations," said the clergyman, again mounting his wooden horse, and setting it rocking, "find themselves where there will be no whisky to refresh them, where do you think you will be, Mistress Croale ?" "Whaur the Lord wulls," answered the woman.