And this I will say, though kennin' my place, 'at Davit Lunan is as dainty a man as is in Thrums, an' there's no one 'at's better behaved at a bural, being particularly wise-like (presentable) in's blacks, an' them spleet new.

Na, na, Jess, Davit may hae his faults an' tak a dram at times like anither, but he would shame naebody at a bural, an' Marget deleeberately insulted him, no speirin' him to Pete's.

What's mair, when the minister cried in to see me yesterday, an' me on the floor washin', says he, 'So Marget's lost her man,' an' I said, 'Say ye so, nae ?' for let on 'at I kent, and neither me at the laying oot nor Davit Lunan at the funeral, I would not.
"'David should hae gone to the funeral,' says the minister, 'for I doubt not he was only omitted in the invitations by a mistake.' "Ay, it was weel meant, but says I, Jess, says I, 'As lang as am livin' to tak chairge o' 'im, Davit Lunan gangs to nae burals 'at he's no bidden to.

An' I tell ye,' I says to the minister, 'if there was one body 'at had a richt to be at the bural o' Pete Lownie, it was Davit Lunan, him bein' my man an' Marget my ain sister.

Yes,' says I, though am no o' the boastin' kind, 'Davit had maist richt to be there next to Pete 'imsel'.' Ou, Jess.