The tailorman an' his laddie 'at should hae bidden wi' us to sew things for the men, walkit off fair skeered one mornin', an' settled doon at the farm o' Craigiebuckle fower mile awa, whaur our lads had to gae to them.

Ay, I mind the tailor's sendin' the laddie for the money owin' him; he hadna the speerit to venture again within soond o' the cradle 'imsel.

The men on the farm though, couldna blame 'im for that.

They were juist as flichtered themsels, an' mony a time I saw them hittin' the dogs for whinin' at the soond.

The wy the dogs took on was fearsome in itsel, for they seemed to ken, aye when nicht cam on, 'at the rockin' would sune begin, an' if they werena chained they cam runnin' to the hoose.