One day the auld doctor, him 'at's deid, was at his tea at the lawyer's, an' says the guidwife, 'Try the cakes, Mr.Riach; they're my own bakin'.' Weel, he was a fearsomely outspoken man, the doctor, an' nae suner had he the bannock atween his teeth, for he didna stop to swallow't, than he says, 'Mistress Geddie,' says he, 'I wasna born on a Sabbath.

Na, na, you're no the first grand leddy 'at has gien me bannocks as their ain bakin' 'at was baked and fired by Jess Logan, her 'at's Hendry McQumpha's wife.' Ay, they say the lawyer's wife didna ken which wy to look, she was that mortified.

It's juist the same wi' sewin'.

There's wys o' ornamentin' christenin' robes an' the like 'at's kent to naebody but hersel; an' as for stockin's, weel, though I've seen her mak sae mony, she amazes me yet.

I mind o' a furry waistcoat I aince had.