Blin' fowk somehoo kens mair nor ither fowk aboot things that the sicht o' the een has unco little to do wi'.
But never min'.

I'm willin' to bide i' the dark as lang as He likes.
It's eneuch for ony bairn to ken that its father's stan'in' i' the licht, and seein' a' aboot him, and sae weel able to guide hit, though it kensna whaur to set doon its fit neist.

And I wat He's i' the licht.
Ye min' that bit aboot the Lord pittin' Moses intil a clift o' the rock, and syne coverin' him wi' his han' till he was by him ?" "Ay, fine that," answered Annie.
"Weel, I canna help thinkin' whiles, that the dark aboot me's jist the how o' the Lord's han'; and I'm like Moses, only wi' this differ, that whan the Lord tak's his han' aff o' me, it'll be to lat me luik i' the face o' him, and no to lat me see only his back pairts, which was a' that he had the sicht o'; for ye see Moses was i' the body, and cudna bide the sicht o' the face o' God.

I daursay it wad hae blin' 't him.

I hae heard that ower muckle licht'll ca fowk blin' whiles.