Ye maun gae through that watshod, I doobt! But there's an ark o' the Covenant that'll carry ye safe ower that and a waur flood to boot--and that's the flood o' God's wrath against evil-doers.--'Upon the wicked he shall rain fire and brimstone--a furious tempest.'-- We had a gran' sermon upo' the ark o' the Covenant frae young Mr Mirky last Sabbath nicht.

What for will na ye come and hear the Gospel for ance and awa' at least, George Macwha?
Ye can sit i' my seat." "I'm obleeged to ye," answered George; "but the muckle kirk does weel eneuch for me.

And ye ken I'm precentor, noo, forbye." "The muckle kirk!" repeated Thomas, in a tone of contempt.

"What get ye there but the dry banes o' morality, upo' which the win' o' the word has never blawn to pit life into the puir disjaskit skeleton.

Come ye to oor kirk, an' ye'll get a rousin', I can tell ye, man.