He hadna speired me at that time, but I just kent.
"It was an auld custom to choose a queen of beauty at the ball, but that night the men couldna 'gree wha should be judge, and in the tail-end they went out thegither to look for one, determined to mak' judge o' the first man they met, though they should have to tear him off a horse and bring him in by force.

You wouldna believe to look at me now, man, that I could have had any thait o' being made queen, but I was fell bonny, and I was as keen as the rest.

How simple we were, all pretending to one another that we didna want to be chosen! Esther Auld said she would hod ahint the tent till a queen was picked, and at the very time she said it, she was in a palsy, through no being able to decide whether she looked better in her shell necklace or wanting it.

She put it on in the end, and syne when we heard the tramp o' the men, her mind misgave her, and she cried: 'For the love o' mercy, keep them out till I get it off again!' So we were a' laughing when they came in.
"Laddie, it was your father and Elspeth's that they brought wi' them, and he was a stranger to us, though we kent something about him afore the night was out.

He was finely put on, wi' a gold chain, and a free w'y of looking at women, and if you mind o' him ava, you ken that he was fair and buirdly, wi' a full face, and aye a laugh ahint it.